काठमाडौं । पाकिस्तानको पञ्जाब प्रान्तमा सामाजिक सञ्जाल टिकटकमा फलोअर्स र भ्युजलाई लिएर दुई दिदीबहिनीबीच भएको विवाद हत्यासम्म पुगेको छ। गुजराँवाला जिल्लाको लद्धेवाला वडैच क्षेत्रमा १५ वर्षीया जुबिया मनाहिलको हत्या गरेको आरोपमा प्रहरीले उनकी १८ वर्षीया दिदीलाई पक्राउ गरेको छ। घटनाबारे मृतकका बुबा अब्दुल शकुर खानले प्रहरीमा जाहेरी दिएपछि मुद्दा दर्ता गरिएको हो।

प्रहरीका अनुसार घटनामा प्रयोग भएको धारिलो हतियारसमेत अभियुक्तबाट बरामद गरिएको छ। लद्धेवाला वडैच प्रहरी स्टेशनका प्रमुख मोहम्मद अफजलले घटनाबारे प्रारम्भिक अनुसन्धान अघि बढिरहेको बताएका छन्। प्रहरीमा परेको जाहेरीअनुसार घटना हुँदा परिवारका सदस्यहरू घरको आँगनमा बसेर कुराकानी गरिरहेका थिए। त्यही क्रममा छतबाट होहल्ला सुनिएपछि परिवारका सदस्यहरू माथि पुगेका थिए। त्यहाँ दुवै दिदीबहिनीबीच विवाद भइरहेको देखिएको थियो। विवादकै क्रममा जेठी छोरीले भान्सामा रहेको चक्कु लिएर जुबियामाथि प्रहार गरेको जाहेरीमा उल्लेख छ। गम्भीर घाइते भएकी जुबियालाई परिवारले तत्काल उपचारको प्रयास गरे पनि अत्यधिक रक्तस्रावका कारण उनको मृत्यु भएको जनाइएको छ।

फलोअर्स र भ्युजलाई लिएर विवाद
प्रहरीको प्रारम्भिक अनुसन्धानले घटनाको पछाडि टिकटकसँग जोडिएको विवाद रहेको देखाएको छ। प्रहरी अधिकारीका अनुसार दुवै दिदीबहिनी टिकटकमा भिडियो बनाउने गर्थे। मृतक बहिनीको फलोअर्स बढी रहेको र आफूभन्दा बहिनीको लोकप्रियता बढेको विषयलाई लिएर अभियुक्त असन्तुष्ट रहेको प्रारम्भिक बयानबाट खुलेको बताइएको छ। प्रहरीका अनुसार अभियुक्तले बहिनीले आफ्ना फलोअर्स ‘चोरेको’ आरोप लगाउँदै आएको र यही विषयमा विवाद बढ्दै गएपछि घटना भएको प्रारम्भिक अनुसन्धानले देखाएको छ। यद्यपि, अभियुक्तका आफन्त गुलाम रसूलले भने दुवै दिदीबहिनी आर्थिक रूपमा आत्मनिर्भर बन्न सामाजिक सञ्जालमा सक्रिय रहेको बताएका छन्। उनका अनुसार उनीहरू प्रायः ‘फूड ब्लगिङ’ लगायतका सामग्री बनाउने गर्थे र सामाजिक सञ्जालमार्फत आफ्नै आम्दानीको बाटो खोजिरहेका थिए।

बुबाले नै प्रहरीको जिम्मा लगाए छोरी
घटनापछि मृतक र अभियुक्त दुवैका बुबा अब्दुल शकुरले जेठी छोरीलाई आफैँ प्रहरीको जिम्मा लगाएको बताएका छन्। उनले छोरीलाई घटनामा दोषी ठहर भए कडा कानुनी कारबाही हुनुपर्ने माग गरेका छन्। आफ्नी छोरीले परिवार नै तहसनहस बनाएको भन्दै आफूले उनको पक्षमा मुद्दाको पैरवी नगर्ने पनि उनले बताएका छन्। तर कानुनी विज्ञहरूका अनुसार अभियुक्तले निजी वकिल नपाएको अवस्थामा पनि कानुनले उसलाई कानुनी प्रतिरक्षाको अधिकारबाट वञ्चित गर्न मिल्दैन। अधिवक्ता शेख उस्मानका अनुसार परिवार वा निजी वकिल उपलब्ध नभए अदालतले सरकारी खर्चमा कानुनी सहायता उपलब्ध गराउन सक्छ। पञ्जाबमा असहाय अभियुक्त तथा कैदीलाई कानुनी सहायता प्रदान गर्ने व्यवस्था रहेको उनले बताएका छन्।

टिकटक आम्दानीको माध्यम बन्दै जाँदा बढ्दो प्रतिस्पर्धा
पाकिस्तानमा सामाजिक सञ्जाल विशेषगरी टिकटक युवापुस्ताका लागि मनोरञ्जनसँगै आम्दानीको माध्यम पनि बन्दै गएको डिजिटल मिडिया अनुसन्धानकर्ता अरहम शफीले बताएका छन्। उनका अनुसार टिकटकमा मनिटाइज भएका खाताबाट भ्युजका आधारमा आम्दानी हुने भएकाले प्रयोगकर्ताबीच फलोअर्स र भ्युज बढाउने प्रतिस्पर्धा तीव्र हुने गरेको छ। परम्परागत रोजगारीका अवसर सीमित रहेका अवस्थामा सामाजिक सञ्जालबाट आम्दानी र लोकप्रियता दुवै हासिल गर्न सकिने भएकाले युवा पुस्ता यसतर्फ आकर्षित भइरहेको उनको भनाइ छ। तर फलोअर्स, भ्युज र आम्दानीलाई लिएर बढ्ने अस्वस्थ प्रतिस्पर्धाले कहिलेकाहीँ व्यक्तिगत विवादलाई समेत गम्भीर घटनामा परिणत गर्न सक्ने यो घटनाले देखाएको छ।