तेहरान। अमेरिका र इजरायलले संयुक्त रूपमा इरानका विभिन्न सैन्य अड्डा र रणनीतिक संरचनामाथि भीषण हवाई आक्रमण गरेपछि मध्यपूर्वमा तनाव चरम बिन्दुमा पुगेको छ। त्यसको प्रतिकारस्वरूप इरानले पनि इजरायलतर्फ मिसाइल र ड्रोन प्रहार गर्दै प्रत्याक्रमण सुरु गरेको जनाएको छ। इरानको शक्तिशाली सैन्य संस्था Islamic Revolutionary Guard Corps (आईआरजीसी) ले विज्ञप्ति जारी गर्दै इजरायली कब्जामा रहेका क्षेत्रतर्फ मिसाइल र ड्रोनको पहिलो लहर प्रहार गरिएको पुष्टि गरेको छ। इरानले आफ्नो सार्वभौमसत्तामाथि भएको हमलाको बदला लिन यो कदम चालिएको स्पष्ट पारेको छ।

यसैबीच राजधानी तेहरान सहित विभिन्न सहरहरूमा शक्तिशाली विस्फोटका आवाजहरू सुनिएका छन्। इरानी समाचार एजेन्सी Tasnim News Agency का अनुसार तेहरानमा दुई वा सोभन्दा बढी ठूला विस्फोट भएका छन्। साथै Ilam सहरका पश्चिमी र दक्षिणी भागमा पनि धमाका सुनिएको रिपोर्ट आएको छ।तेहरानको केन्द्र भाग तथा संवेदनशील सैन्य क्षेत्रहरूमा इरानी वायु रक्षा प्रणाली सक्रिय गरिएको छ। मिसाइलहरू सैन्य परिसर र सरकारी संरचना नजिक खसेको खबर आएको छ। साथै Kermanshah, Lorestan Province, Tabriz, Isfahan र Karaj लगायतका स्थानबाट पनि विस्फोटका विवरणहरू सार्वजनिक भइरहेका छन्।

उता इजरायली प्रधानमन्त्री बेन्जामिन नेतान्याहूँले इरानमाथिको आक्रमण आफ्नो देशको अस्तित्वमाथिको खतरा हटाउन आवश्यक रहेको बताएका छन्। उनले अमेरिका–इजरायलको संयुक्त कदमले इरानी जनतालाई आफ्नो भविष्य आफैं तय गर्ने वातावरण सिर्जना गर्ने दाबी गरेका छन्। यसैबीच अमेरिकी राष्ट्रपति डोनाल्ड ट्रंपले इरानको शासनबाट उत्पन्न खतरा समाप्त पार्न ‘ठूलो युद्ध अभियान’ सुरु भएको घोषणा गरेका छन्। अमेरिकी अधिकारीहरूका अनुसार संयुक्त हवाई आक्रमणको मुख्य लक्ष्य इरानको सैन्य संरचना र सुरक्षा संयन्त्रलाई कमजोर बनाउनु रहेको छ।

इरानबाट मिसाइल प्रहार भएपछि इजरायल भरि चेतावनीका साइरन बजाइएको छ। नागरिकहरूलाई नजिकका सुरक्षित सेल्टरमा बस्न निर्देशन दिइएको छ भने देशभर संकटकाल घोषणा गरिएको छ।विश्लेषकहरूका अनुसार यो घटनाले मध्यपूर्वलाई पूर्णस्तरको क्षेत्रीय युद्धतर्फ धकेल्ने खतरा बढाएको छ, जसको असर विश्व सुरक्षा, तेल बजार र अन्तर्राष्ट्रिय राजनीति सबैमा पर्ने सम्भावना रहेको छ।