काठमाडौं । नेपाल उद्योग वाणिज्य महासंघ (एफएनसीसीआई) को कार्यकारिणी सदस्य पदमा व्यवसायी रबिन पुरी ६६ मतसहित विजयी भएका छन्। वस्तुगत संघतर्फबाट उम्मेदवारी दिएका पुरीले उत्पादनमूलक उद्योग, कृषि–आधारित उद्यम तथा निजी क्षेत्रको नीतिगत प्रतिनिधित्वलाई मुख्य एजेन्डा बनाउँदै चुनावी प्रतिस्पर्धामा सफलता हासिल गरेका हुन्। दाना उद्योग, पशु आहार, कृषि तथा पर्यटन क्षेत्रमा तीन दशकभन्दा लामो अनुभव बोकेका पुरी महासंघभित्र अनुभवी र परिणाममुखी नेतृत्वका रूपमा परिचित छन्। 

हालसम्म एफएनसीसीआईभित्र विभिन्न भूमिकामा सक्रिय रहँदै आएका उनीसँग महासंघको करिब ९ वर्षको संस्थागत अनुभव रहेको छ। पुरी नेपाल दाना उद्योग संघका निवर्तमान अध्यक्ष समेत हुन्। उनले उक्त संघमा महासचिव र दुई कार्यकाल अध्यक्षको जिम्मेवारी सम्हालिसकेका छन्। दाना उद्योगसँग सम्बन्धित नीतिगत सुधार, कच्चा पदार्थ आपूर्ति व्यवस्थापन, उत्पादन लागत नियन्त्रण तथा उद्योगी–व्यवसायीका साझा मुद्दामा उनले प्रभावकारी भूमिका खेलेको व्यवसायिक वृत्तको बुझाइ छ।

३० वर्षको व्यावसायिक अनुभव
रबिन पुरीको उम्मेदवारीको मुख्य आधार उनको ३० वर्षभन्दा लामो व्यावसायिक अनुभव हो। उनले पशु आहार, पोल्ट्री, कृषि तथा पर्यटनसँग सम्बन्धित विभिन्न क्षेत्रमा सक्रिय भूमिका निर्वाह गर्दै आएका छन्। व्यवसायिक यात्राका क्रममा उनले उद्योग सञ्चालनका चुनौती, उत्पादन लागत, श्रम व्यवस्थापन, कच्चा पदार्थ आपूर्ति, कृषि–आधारित उद्योगको सम्भावना तथा निर्यातमुखी उद्योग विकासका विषयमा गहिरो अनुभव हासिल गरेका छन्। उद्योगी–व्यवसायीहरूका अनुसार अहिलेको आर्थिक सुस्तता, उत्पादन लागत वृद्धि, बैंकिङ तरलता अभाव, आयात–निर्यात असन्तुलन तथा उद्योगमैत्री नीतिको कमीका बीच उत्पादन क्षेत्र बुझेको नेतृत्व महासंघभित्र आवश्यक रहेको छ। यही कारण पुरीको उम्मेदवारीलाई धेरैले वस्तुगत संघहरूको वास्तविक आवाजका रूपमा हेरेका छन्।

महासंघभित्र ९ वर्षको सक्रियता
एफएनसीसीआईभित्र ९ वर्षको सक्रिय अनुभवले पुरीलाई महासंघको संरचना, प्रक्रिया र नीतिगत चुनौतीबारे स्पष्ट बुझाइ दिएको छ। सरकार–निजी क्षेत्र साझेदारी, औद्योगिक प्रवर्द्धन, लगानी वातावरण, कर प्रणाली तथा वस्तुगत संघहरूको प्रतिनिधित्वजस्ता विषयमा उनले प्रत्यक्ष रूपमा काम गरिसकेका छन्। व्यवसायिक समुदायमा उनलाई शान्त, समन्वयकारी, विषयवस्तुमा स्पष्ट र परिणाममुखी व्यक्तित्वका रूपमा चिनिन्छ। यही कारण वस्तुगत संघतर्फका धेरै प्रतिनिधिहरूले उनलाई अनुभवी उम्मेदवारका रूपमा समर्थन गरेका थिए।

वस्तुगत संघहरूको एजेन्डामा जोड
पुरीले महासंघभित्र वस्तुगत संघहरूको प्रभावकारी प्रतिनिधित्वलाई आफ्नो प्रमुख प्राथमिकता बनाएका छन्। उनले उत्पादनमूलक उद्योगको संरक्षण, उद्योगमैत्री नीति निर्माण, कच्चा पदार्थ आपूर्तिमा सहजीकरण, ऊर्जा तथा वित्तीय पहुँच विस्तार, निर्यात प्रवर्द्धन र घरेलु उत्पादनको प्रतिस्पर्धात्मक क्षमता वृद्धि जस्ता विषयलाई महासंघको मुख्य एजेन्डा बनाउने प्रतिबद्धता व्यक्त गरेका छन्।उनका अनुसार नेपालको अर्थतन्त्रको मेरुदण्ड उत्पादन, कृषि–आधारित उद्योग र उद्यमशीलता भएकाले महासंघले सेवा र व्यापारसँगै उत्पादनमूलक उद्योगलाई पनि समान प्राथमिकता दिन आवश्यक छ।

विभिन्न उद्योगमा सक्रिय आवद्धता
रबिन पुरी विभिन्न औद्योगिक तथा व्यावसायिक संस्थासँग आवद्ध छन्। उनी काभ्रेको कब नेपाल प्रालि, धार्केको पञ्चकन्या पोल्ट्री ब्रीडिङ फर्म प्रालि, हेटौंडाको सिद्धार्थ पेलेट फिड इन्डस्ट्रिज तथा बुटवलस्थित हिमाली पोल्ट्री फर्मसँग समेत आबद्ध रहेका छन्। यी संस्थासँगको संलग्नताले उनको अनुभव एउटा क्षेत्र वा भूगोलमा सीमित नभई बहुआयामिक उद्योग व्यवस्थापनमा फैलिएको देखिन्छ। विशेषगरी पोल्ट्री, दाना तथा कृषि–आधारित उद्योग नेपालका ग्रामीण अर्थतन्त्र, रोजगारी सिर्जना, किसानको आम्दानी र खाद्य सुरक्षासँग प्रत्यक्ष रूपमा जोडिएका क्षेत्र हुन्। यही कारण पुरीलाई उत्पादनमूलक अर्थतन्त्रको व्यवहारिक अनुभव बोकेको नेतृत्वका रूपमा हेरिएको छ।

नीतिगत पैरवी गर्न सक्ने नेतृत्व
निजी क्षेत्र अहिले उच्च ब्याजदर, कर्जा पहुँच, कर प्रशासन, ऊर्जा लागत, नीतिगत अस्थिरता तथा पूर्वाधार अभावजस्ता चुनौतीसँग जुधिरहेको अवस्थामा महासंघभित्र बलियो नीतिगत पैरवी गर्न सक्ने नेतृत्वको आवश्यकता रहेको व्यवसायिक क्षेत्रको धारणा छ। पुरीले संस्थागत नेतृत्वमार्फत सरकारी निकायसँग संवाद, उद्योगीहरूको साझा मुद्दामा समन्वय तथा निजी क्षेत्रका सरोकार उठाउँदै आएका कारण उनको भूमिकाप्रति अपेक्षा बढेको छ।तीन दशकको व्यावसायिक अनुभव, महासंघभित्रको ९ वर्षे सक्रियता, नेपाल दाना उद्योग संघमा सफल नेतृत्व तथा उत्पादनमूलक उद्योगसँगको गहिरो सम्बन्धका आधारमा रबिन पुरीलाई वस्तुगत संघहरूको साझा आशाका उम्मेदवारका रूपमा हेरिएको थियो। अहिले कार्यकारिणी सदस्यमा निर्वाचित भएसँगै निजी क्षेत्रभित्र उनले अझ प्रभावकारी भूमिका खेल्ने अपेक्षा गरिएको छ।