कास्की । लगातारको वर्षासँगै आएको बाढी र पहिरोले मनाङको चामेमा जोखिम बढाएको छ। सदरमुकाम चामेको चारैतिरका डाँडाबाट पटक–पटक पहिरो खस्दा कर्मचारी, सुरक्षाकर्मी र स्थानीयहरू त्रासमा सुरक्षित स्थान खोज्दै भाग्न बाध्य भएका छन्। सहायक प्रमुख जिल्ला अधिकारी कृष्णप्रसाद पौडेलले फोनमा कुरा गर्नसमेत नसक्ने अवस्था रहेको बताएका छन्। उनका अनुसार चामे आसपास निरन्तर पहिरो झरिरहेको छ र रातिको समयमा थप जोखिम बढेको छ।

मर्स्याङ्दी नदी तथा स्थानीय खोलासमेत पहिरोका कारण केही थुनिँदा तटीय बस्तीमा बाढीको जोखिम बढेको छ। सडकहरू पहिरोले अवरुद्ध भएका छन् भने माथिबाट पहिरो खस्ने र तल जमिन भासिने अवस्थाका कारण आवतजावत कठिन बनेको छ। चामे गाउँपालिकाकी सामुदायिक स्वास्थ्य अधिकृत छोडेन याङचेन लामाका अनुसार बालबालिका, ज्येष्ठ नागरिक र अशक्तलाई सुरक्षित स्थानमा सार्न कठिन भइरहेको छ। स्थानीयहरू शनिबार राति समेत मर्स्याङ्दी किनार छाडेर जङ्गलमा बसेका थिए।

नेपाल प्रहरी र सशस्त्र प्रहरीले सडक खुलाउने प्रयास गरिरहेका भए पनि लगातारको पहिरो र भौगोलिक विकटताका कारण उद्धार प्रभावकारी हुन सकेको छैन। स्थानीयले जनप्रतिनिधि र सरकारसँग तत्काल हेलिकप्टरमार्फत उद्धारको माग गरेका छन्।